Azərbaycanda nəqliyyat-kommunikasiya və enerji dəhlizləri haqqında kitab təqdim edilib

ANmedia.az "Report"un məlumatna istinadən bildirir ki, kitab Prezident İlham Əliyevin uğurlu dəhliz strategiyasına həsr edilən Azərbaycanın nəqliyyat-kommunikasiya və enerji dəhlizləri, həmçinin materikin 30-dan çox dəhlizini əhatə edir.

Təqdimatda UNEC-in rəhbərliyi, millət vəkilləri, müxtəlif dövlət qurumlarının rəhbər şəxsləri, tanınmış politoloqlar, iqtisadçı ekspertlər, media nümayəndələri və digər qonaqlar iştirak ediblər.

Təqdimat mərasimində E. Əmirov bildirib ki, "Avrasiyanın Arteriyaları" adlı kitabın üzərində 2 il 3 ay çalışıb: "Kitab Azərbaycanla yanaşı ABŞ-ın, Çinin, Rusiyanın və digər dünya nəhənglərinin üzərində mübarizə apardığı Avrasiyanın 30-dan çox nəqliyyat-kommunikasiya və enerji dəhlizləri haqqındadır. Burada bu dəhlizlərin yaranma tarixi, əhatə coğrafiyası, texniki-iqtisadi göstəriciləri, iştirakçı ölkələr və bu ölkələrin toqquşan maraqları, hər dəhliz komponenti uğrunda gedən müharibələr və perspektivlərinə dair təhlillər verilib".

O qeyd edib ki, eyni zamanda kitabda Prezident İlham Əliyevin təşəbbüsü ilə yaradılan 10-a yaxın nəqliyyat-kommunikasiya və enerji dəhlizlərinin hər birinin ayrı-ayrılıqda qlobal geosiyasətin əsas komponentinə necə çevrildiyinin detalları incəliklə təqdim edilib: "Rusiya dəhlzilərinin ABŞ tərəfindən necə sıradan çıxarılması, Çinin Rusiyanın bu vəziyyətində neçə məharətlə istifadə etməsi, Türkiyədə Qaz Habının yaradılmasının nə üçün mümkün olmayacağı, bizim Cənub Qaz Dəhlizimizdən 10 dəfə böyük tutumu olan Rusiyanın "Şimal Axını"nın Baltik dənizinin dibində necə partladıldığı və onun gələcək aqibəti, Çinin "Kəmər və Yol Təşəbbüsü"nün hansı ölkələr üçün fəlakətə çevrilməsi, Cozef Baydenin təşəbbüsü ilə irəli sürülən İMEC dəhlizi və İsrail-Həmas müharibəsi arasında əlaqə və ehtimal edilən perspektivləri və digər maraqlı məqamlar kitabda geniş şəkildə öz əksini tapıb. Buna görə də kitabın Azərbaycanla yanaşı, tərcümə edilərsə Rusiya və Türkiyə, eləcə də digər ölkələrdən olan oxucular üçün də maraq doğuracağını gözləyirəm".

Tədbirdə çıxış edənlər ölkə rəhbərinin dəhliz strategiyasının bütün komponentləri ilə ictimaiyyətə təqdim edilməsi baxımından bu kitabın böyük əhəmiyyətindən danışıblar.

Eyni zamanda bildirilib ki, kitabda Ümummilli Lider Heydər Əliyevin və Prezident İlham Əliyevin təşəbbüsü ilə yaradılan 10-a yaxın nəqliyyat-kommunikasiya və enerji dəhlizlərinin qlobal geosiyasətin əsas komponentinə necə çevrildiyinin detalları kitabın müəllifi tərəfindən incəliklə təqdim edilib.

Həmçinin, çixış edənlər kitabın ciddi əhəmiyyətindən və maarifləndirmə işlərində oynayacağı roldan danışıb, dəhlizlərin texniki-iqtisadi və digər göstəricilərinin dəqiq ifadə edildiyinə görə onun ali məktəblərdə dərs vəsaiti kimi istifadə edilə biləcəyini vurğulayıblar.

Tədbirdə iştirak edən natiqlər 30-dan artıq dəhlizə dair məlumatların, təhlil və proqnozların bir kitabda öz əksini tapmasının nadir hal olduğunu bildiriblər.

Qeyd edək ki, "Avrasiyanın Arteriyaları" kitabında müəllif tərəfindən ABŞ, Rusiya, Çin və digər dünya nəhənglərinin Avrasiyanın dəhlizləri uğurunda apardığı mübarizə və bu mübarizənin yaratdığı münaqişələr, onların təzyiqi ilə məhv edilən və məhvi planlaşdırılan dəhlizlər haqqında, eləcə də onların gələcəyinə dair təhlil və proqnozlar verilib.

Kitabın region ölkələri və Avropa oxucuları üçün də maraq doğuracağı gözlənilir.