“VEX IQ” robot yarışmasında Respublika üzrə I yerin qalibləri məlum olub

“VEX IQ” robot yarışmasında Respublika üzrə  I yerin  qalibləri məlum olub.
 
ANmedia.az xəbər verir ki, 18 yanvar tarixində “STEAM Azərbaycan” layihəsinin təşkilatçılığı ilə robot texnologiyaları və mühəndislik sahəsinin atası sayılan Joseph Engelbergerin 100 illik yubileyinə həsr edilmiş “VEX Robotics” yarışlarının “VEX IQ” kateqoriyası üzrə “JosephCUP 2025” adlı Respublika turniri baş tutmuşdur.

Bu yarışda Bakı Avropa liseyinin komandası “VEX IQ robotics competition”  kateqoriyası üzrə 1- ci yerin qalibi olublar.

Kateqoriya adı: VEX IQ robotics competition,
Komanda adı: Mech4
Mentor: Səriyyə Həmidova
Şagirdlər: 
1. Rzayev Davud 7r2
2. Tağızadə Tofiq 7a2
3. Lalayev Omar 7a2
4. Lalayev Səlim 5a3

Qeyd edək ki, turnirin əsas məqsədi Azərbaycan gənclərinin mühəndislik, robot texnologiyaları və rəqəmsal bacarıqlar sahəsində bilik və bacarıqlarını inkişaf etdirmək olmuşdur. 

Respublika turniri böyük maraq doğurmuş və ölkə üzrə geniş miqyasda keçirilmişdir. Tədbirdə Azərbaycanın 19 fərqli regionundan 50-dən çox komanda iştirak etmişdir ki, bu da ümumilikdə 300-dən çox şagirdi əhatə etmişdir. İştirak edən komandalar təhsil aldıqları məktəbləri təmsil edərək həm fərdi bacarıqlarını nümayiş etdirmiş, həm də komanda ruhunu ön plana çıxarmışdır.

Turnir beynəlxalq "VEX Robotics" yarışının standartlarına uyğun olaraq təşkil olunmuş və “VEX IQ” kateqoriyası üzrə müxtəlif tapşırıqları və robotların proqramlaşdırılmasını əhatə etmişdir. Şagirdlər əvvəlcədən hazırlanmış robotları ilə xüsusi tapşırıqları yerinə yetirərək həm texniki biliklərini, həm də strateji düşüncə qabiliyyətlərini nümayiş etdirmişdir.

Müsabiqə zamanı iştirakçılar həm yarış meydanında tapşırıqlar yerinə yetirmiş, həm də robotlarının dizaynı, mühəndislik prosesləri və proqramlaşdırma bacarıqlarını münsiflər heyətinə təqdim etmişdir. Bu yanaşma, yarışın yalnız texniki deyil, həm də yaradıcı və analitik tərəflərinə diqqət yetirildiyini göstərir.