Pıçıldar zaman

24 aprel 2024-cü il tarixdə Beynəlxalq Muğam Mərkəzində Azərbaycan xalq rəssamı, professor Rafiq Mehdiyevin qızı Lalə Mehdiyevanın yaradıcılıq gecəsi keçirilib. Lalə Mehdiyeva 34 ildir Müslüm Maqomayev adına 26 saylı 11 illik musiqi məktəbində pedaqoji fəaliyyətlə məşğuldur. O, məktəbin Nəzəriyyə şöbəsinin müəllimidir. Bü günə kimi onun yetirmələri yerli və beynəlxalq müsabiqələrin qalibi olublar. İncə ruhlu Lalə Mehdiyeva incəsənətə, musiqiyə bütün qəlbi ilə bağlıdır. Bəstələri ilə yanaşı, eyni zamanda onlarla şeir müəllifidir. “Pıçıldar zaman”  adlanan yaradıcılıq gecəsində Lalə Mehdiyevanın müəllifi olduğu əsərləri, xalq musiqi nümunələri və bəstəkar əsərlərinin müxtəlif tərkibli kollektivlər üçün işləmələri dinlənilib. Konsert Müslüm Maqomayev adına 26 saylı 11 illik musiqi məktəbinin müəllim və şagird kollektivinin iştirakı ilə keçirilib.

 Yaradıcılıq gecəsində məktəbin müəllimləri, Günel Quliyeva, Nərmin İbrahimova, Nigar Şabanova, Nigar Seyidzadə, xormeystr Vüsalə Məmmədova və digər əməkdaşlar da iştirak ediblər. Konsertdə məktəbin xor kollektivinin ifası da dinlənilib. Konsert proqramında Lalə Mehdiyevanın sözlərini və musiqisinin müəllifi olduğu “Ana Vətən”, “Azərbaycanım”, ”Vokaliz”, “İthaf” və s. əsərləri ifa edilib. Vətəninə, torpağına, dilinə bağlı olan Lalə Mehdiyevanın şəhidlərə həsr etdiyi musiqi əsəri də konsert proqramında ifa edilib. Yaradıcılıq gecəsində Lalə Mehdiyevanın yetirmələri çıxış edərək musiqiçiyə ürək sözlərini söyləyiblər. Həmçinin, tədbirdə musiqiçinin qardaşı sənətşünaslıq üzrə fəlsəfə doktoru, Azərbaycan Rəssamlar İttifaqının üzvü, əməkdar rəssam Rəşad Mehdiyev də çıxış edərək, bacısı ilə olan uşaqlıq xatirələrindən danışıb. Rəşad Mehdiyev bildirib ki, Lalə Mehdiyevanın hələ uşaqkən musiqiyə, sözə marağı olub. Məktəb yaşlarından şeir yazmağa başlayıb. Yaradıcılıq gecəsinin sonunda M.Maqomayev adına musiqi məktəbinin direktoru Gülşən Quliyeva çıxış edərək Lalə xanımı təbrik etmiş, konsertin təşkilində əməyi keçən hər kəsə öz təşəkkürünü bildirmişdi.