Dövlət büdcəsində uşağın anadan olmasına görə müavinət 4 mln. manat artırılır

Dövlət büdcəsində uşağın anadan olmasına görə müavinətə ayrılan vəsait artırılır, dəfn üçün müavinətə ayrılan vəsait isə azaldılır.

ANmedia.az xəbər verir ki, bu  Milli Məclisin İqtisadi siyasət, sənaye və sahibkarlıq komitəsinin iclasında müzakirəyə çıxarılan “ Dövlət sosial müdafiə fondunun 2023-cü il büdcəsi haqqında” qanuna təklif edilən dəyişiklikdə əksini tapıb.

Layihəyə əsasən, uşağın anadan olmasına görə əhaliyə ödənişlər üzrə xərclərin 28 milyon manatdan 32 milyon manata qaldırılması, dəfn üçün müavinətə ayrılan xərclərin 41 milyon manatdan 37 milyon manata endirilməsi təklif edilir.

Qeyd edilib ki, “Sosial müavinətlərin məbləğinin artırılması və “Sosial müavinətlərin məbləğinin artırılması haqqında” Azərbaycan Respublikası Prezidentinin 2013-cü il 29 avqust tarixli 973 nömrəli Fərmanında dəyişiklik edilməsi barədə” 2023-cü il 13 yanvar tarixli 1966 nömrəli Azərbaycan Respublikası Prezidentinin Fərmanına əsasən 2023-cü ilin yanvar ayının 1-dən uşağın anadan olmasına görə müavinətin məbləği 300 manatdan 500 manata qaldırılıb. Fərmanın icrası məqsədilə bu növ müavinətlər üzrə Fondun büdcəsində nəzərdə tutulmuş məbləğin 4 milyon manat artırılması zərurəti meydana çıxıb. Eyni zamanda pandemiyanın təsirlərinin minimuma enməsi nəticəsində Fondun büdcəsinin xərc istiqamətlərindən biri olan dəfn üçün müavinətlərin məbləğinin

4 milyon manat azaldılmasına imkan verməkdədir.

Eyni zamanda layihəyə əsasən, müvafiq icra hakimiyyəti orqanının müəyyən etdiyi orqanın (qurumun) aparatının və digər struktur bölmələrinin saxlanılması xərclərinin 102 700 000.0 manatdan 106 700 000.0 manata qaldırılması təklif edilir.

Qeyd edək ki, dövlət sosial müdafiə fondunun gəlirləri və xərcləri artırılaraq, 6 milyard 267 milyon 970 min manata qaldırılması təklif edilir.