Xalq artistinin solo konserti olacaq

Xalq artisti Əlixan Səmədovun solo konserti olacaq. 

ANmedia.az xəbər verir ki, konsert Azərbaycanın sevimli musiqiçi və sənətkarı, tanınmış virtuoz balaban ifaçısı və ustadı Əlixan Səmədovun  60 illik yubileyinə həsr olunub. 

20 aprel tarixində türk orkestrinin müşayiəti ilə keçiriləcək konsert Heydər Əliyev Sarayında baş tutacaq. Konsertdə tanınmış ifaçı ən sevilən ifaları yer alacaq.  

Balabanın sehirli səsindən zövq almaq üçün tələsin.

Xatırladaq ki, Əlixan Səmədov 27 aprel 1964-cü ildə Sumqayıtda musiqiçi ailəsində anadan olub. Səməd Vurğun adına Musiqi Məktəbində obua və Nəriman Nərimanov adına Mədəniyyət Evində qarmon təhsili alıb (1979 −1982). Azərbaycan Dövlət Pedaqoji Universitetində təhsil alıb (1986–1990). Nəfəsli alətləri (balaban, klarnet, qaboy, tütək, zurna, saksafon) və xalq çalğı alətlərini (nağara, qoşanağara, dəf, qarmon) böyük bir ustalıqla ifa edir. 1993-cü ildə musiqi sənətini daha da inkişaf etdirmək məqsədi ilə Türkiyəyə köçən Səmədov balabanı ilə qısa müddətdə böyük dinləyici kütləsi qazanıb. "Balaban metodu" kitabının müəllifi Əlixan Səmədov müxtəlif mükafatlara layiq görülüb. 27 may 2018-ci ildə Azərbaycanın xalq artisti fəxri adına layiq görülmüşdür.