Bakıda konsert verən italyan pianoçu: “Vaqif Mustafazadənin əsərlərini ifa edirəm” - MÜSAHİBƏ- FOTO

Bu günlərdə məşhur italyan pianoçusu Lorentso Banyati Bakıda ilk dəfə olaraq solo konsert proqramı ilə çıxış edib.

Musiqiçi bakılı musiqisevərlər üçün Ferents List, Moris Ravelin, Klod Debüssinin və digər bəstəkarların ən populyar əsərlərini ifa edib.

Lorentso Banyati Benedetto Marçello adına nüfuzlu Venesiya Konservatoriyasını bitirib, daha sonra təhsilini Moskva şəhərində yerləşən Qnessin adına Rusiya Musiqi Akademiyasında davam etdirib.

Hazırda musiqiçi Moskvada maestro Eliso Virsaladzenin rəhbərliyi altında öz bacarıqlarını təkmilləşdirir.

Ölkəmizdə olan Lorentso Banyati müsahibəsində Bakıdakı konsert proqramından və şəhər haqqında təəssüratlarını bölüşüb, həmçinin niyə Rusiyaya köçmək qərarı verdiyini açıqlayıb.

- Lorentso, Bakıda özünüzü necə hiss edirsiniz?

- Şəhərinizi çox bəyəndim. Məni ən çox sevindirən o oldu ki, Bakıda doğma İtaliyamın “adası”, bir parçası olan - “Kiçik Venesiya” var. Çox erkən olduğu üçün qayığa minə bilmədim, amma bir neçə şəkil çəkib ailəmə göndərdim. Həmçinin Bakı bulvarını, Fəvvarələr meydanını, İçərişəhəri gəzdim. Rəssam Əli Şəmsinin qonağı oldum, orada bir neçə fotoşəkil çəkdim, o cümlədən şəhərinizdə olan görməli yerləri özündə əks etdirən əsərləri də fotokameramın yaddaşına köçürdüm.

- Bəs Azərbaycan musiqisi ilə necə, tanışsınızmı?

- Bəli. Mən Paris Ali Normal Məktəbində dərs deyən dünya şöhrətli müəllim Rəna Şereşevskayadan dərs alıram. O, Bakıdandır, ona görə də mənim Azərbaycana uçduğumu biləndə inanılmaz dərəcədə sevindi. Onunla tez-tez müxtəlif xarici, o cümlədən Azərbaycan bəstəkarlarının əsərlərini müzakirə edirik. Ən çox Vaqif Mustafazadə və qızı Əzizənin bəstələrini bəyənirəm. Onları bəzən özüm üçün ifa edirəm. Təəssüf ki, bu dəfə onların heç bir əsərini hazırlaya bilmədim, amma növbəti dəfə mütləq edəcəyəm. Bakıdakı konsertim yüksək səviyyədə keçdi. Tamaşaçılar məni çox isti qarşıladılar.

illərdir Rusiyada yaşayırsınız. Niyə Moskvaya köçməyə qərar verdiniz?

- 17 yaşımda Florensiyada keçirilən musiqi yarışmasında birinci yeri tutdum və mükafat olaraq bir ay ərzində konsertlər vermək və ustad dərsləri almaq təklifi ilə Moskvaya səyahət etmək imkanı qazandım. Mən həmişə Rusiya mədəniyyəti ilə maraqlanmışam və bir ay Moskvada yaşadıqdan sonra yenidən ora qayıtmaq istədiyimi başa düşdüm və buna görə də təhsilimi Rusiyada davam etdirmək qərarına gəldim - Qnessin adına Rusiya Musiqi Akademiyasında magistr pilləsinə daxil oldum. Valideynlərim seçimimi dəstəklədilər. Məndə rus ədəbiyyatına, musiqisinə məhəbbət aşılayan anam və atam olub. Atam lütnya (bizim udabənzər musiqi aləti) ifaçısı, Venesiya Konservatoriyasının professoru, anam isə barokko stilində müğənni və filosofdur.  

- Rus dilini öyrənmək çətin idi?

- Mən Moskvaya gələndə rus dilində bir kəlmə belə bilmirdim. Dərhal dil öyrənməyə başladım və akademiyada müəllimlərim bu işdə mənə kömək etdilər. Həftədə 16 saat rus dilini öyrənməyə sərf edirdim. İndinin özündə də bu dili öyrənməyə davam edirəm. Hiss edirəm ki, artıq öz arzuma - Puşkinin, Dostoyevskinin, Mayakovskinin əsərlərini orijinalda sərbəst oxumağa yaxınlaşıram. Özümü əsl rus oğlanı kimi hiss edirəm.

- Sevginizi Rusiyada tapdığınızı deyirlər?

- Bəli, ilk baxışdan sevgi idi. Düşünürəm ki, Dina Borisova Rusiyada başıma gələn ən yaxşı şeydir. O, gözəl müğənnidir, hətta bəzən birlikdə çıxış edirik. Əvvəlcə ingilis dilində ünsiyyət qururduq, indi rus dilində danışırıq.

- Lorentso, valideynlərinizin də yaradıcı insanlar olduğunu qeyd etdiniz. Buna görə pianoçu olmağa qərar verdiniz?

- Evimizdə həmişə musiqi səslənirdi, ona görə də onu sevməmək mümkün deyildi. Mənim iki bacım və iki qardaşım var və onların hamısı peşəkar musiqiçilərdir: skripkaçı, violonçelçi, kontrabasçı və pianoçu. Dörd yaşımdan fortepiano dərsləri almağa başladım, sonra Benedetto Marçello adına nüfuzlu Venesiya Konservatoriyasına daxil olmaq qərarına gəldim. Yeddi yaşımda ilk konsertimi verdim. Sonra Düsseldorfda keçirilən Beynəlxalq Anton Rubinşteyn müsabiqəsində və “American Protégé International Piano and String Competition” beynəlxalq müsabiqəsində iştirak etdim və bu mənə Nyu-Yorkdakı “Carnegie Hall”da çıxış etmək imkanı qazandırdı.

İki il əvvəl Qnessin adına Rusiya Musiqi Akademiyasında təhsilimi başa vurdum, amma indi də oxumağa davam edirəm. Bu işdə mənə SSRİ Xalq artisti Eliso Virsaladze kömək edir.

- Siz həm də bloqer oldunuz: Bu necə baş verdi?

- Pandemiya zamanı bloq yaratmaq qərarına gəldim. Konsertlər ləğv edildi və daha çox boş vaxtım oldu. Mən əsasən rus və italyan mədəniyyəti və adət-ənənələri haqqında danışıram. Niyyətim bu iki xalqı bir-birinə yaxınlaşdırmaqdır.

Mənbə: Sputnik Azərbaycan