Zəfər Günü Ədliyyə Nazirliyində təntənəli qeyd olunub

Ölkə Prezidenti, Müzəffər Ali Baş Komandan cənab İlham Əliyevin rəhbərliyi ilə Vətən müharibəsində qazanılmış parlaq zəfərimizin üç ili tamam olur. Tarixi qələbəmizi əbədiləşdirmək məqsədilə dövlət başçısı tərəfindən təsis edilmiş 8 noyabr – Zəfər Günü bu il həm də ilk dəfə Şuşa şəhəri günü kimi qeyd olunur.

ANmedia.az xəbər verir ki, bu barədə Ədliyyə Nazirliyinin mətbuat xidmətindən məlumat verilib.

Bu münasibətlə Ədliyyə Nazirliyində və struktur qurumlarda silsilə tədbirlər təşkil edilib, II Fəxri xiyabanda Vətən müharibəsi qəhrəmanlarının məzarları ziyarət olunaraq üzərinə tər çiçəklər düzülüb, o cümlədən şəhid ədliyyə işçisi Ruhin Xəlilovun xatirəsi anılıb, nazirlikdəki barelyefi önünə gül səbəti qoyulub.

Noyabrın 7-də Ədliyyə Nazirliyində Zəfər Gününə həsr olunan təntənəli yığıncaq keçirilib.

Tədbirdə ədliyyə naziri Fikrət Məmmədov, nazirliyin rəhbər heyəti və əməkdaşları, o cümlədən müharibə veteranları və kollektivin üzvü şəhid ədliyyə işçisinin həyat yoldaşı iştirak ediblər.

Əvvəlcə bu il 100 illiyini geniş qeyd etdiyimiz ulu öndər Heydər Əliyevin nazirlikdə büstü önünə gül dəstələri qoyularaq əziz xatirəsi dərin ehtiramla yad edilib. Sonra keçirilən tədbir Azərbaycanın Dövlət Himninin səsləndirilməsi ilə başlayıb.

Çıxış edən ədliyyə naziri Zəfər Günü münasibətilə kollektivi təbrik edib, bu ilki bayramın “Heydər Əliyev İli”ndə qeyd edilməsi ilə əlamətdar olduğunu bildirib, ölkə Prezidenti, Müzəffər Ali Baş Komandan cənab İlham Əliyevin Şuşanı, Qarabağı azad edərək Ulu Öndərin ən böyük arzusunu yerinə yetirdiyini vurğulayıb. Qarabağda Ermənistanın mina terroruna qarşı lokal xarakterli antiterror tədbirləri aparılaraq suverenliyimizin tam təmin olunduğunu qeyd edib.

Bildirib ki, milli suverenliyin simvolu kimi üçrəngli bayrağımıza hörmət və ehtiram əlaməti olaraq təsis edilmiş Dövlət Bayrağı Günü yaxınlaşır və qürur mənbəyimiz olan bayrağımız bu gün Qarabağın hər yerində, o cümlədən Xankəndi şəhərində dövlət başçısı tərəfindən ucaldılaraq vüqarla dalğalanır.

Nazir möhtəşəm qələbəmizin memarı cənab Prezident İlham Əliyevin 20 illik zəfər yolundan danışaraq müstəqil Azərbaycanı güclü və qüdrətli dövlətə çevirdiyini, respublikamızın hərtərəfli davamlı tərəqqisini təmin etdiyini vurğulayıb. Doğma torpaqlarımızın dövlət başçısının rəhbərliyi və Birinci vitse-prezident Mehriban xanım Əliyevanın fəal iştirakı ilə sürətli bərpa-quruculuq işləri aparılmaqla yenidən dirçəlməsini, soydaşlarımızın öz dədə-baba yurdlarına qayıdışını qeyd edib, şəhid ailələrinin və qazilərimizin sosial rifahının yaxşılaşdırılması ilə bağlı görülən ardıcıl tədbirlərdən danışıb. Nazirlik tərəfindən müharibə iştirakçılarının, şəhidlərimizin ailə üzvlərinin müraciətlərinə xüsusi həssaslıqla yanaşılaraq 100-dən çox belə şəxslərin ədliyyə orqanlarına qulluğa qəbul olunduğu bildirilib.

Vətən müharibəsində ədliyyə və məhkəmə işçilərinin igidlik və mərdliklə iştirak edərək əsl vətəndaşlıq nümunəsi və fədakarlıq göstərdiyi vurğulanaraq onların çoxsaylı dövlət medallarına layiq görüldüyü qeyd olunub, növbəti bir qrup əməkdaşa “Vətən müharibəsi iştirakçısı” medalı təqdim edilib.

44 günlük çətin və şərəfli döyüş yolundan bəhs edən nazirliyin əməkdaşı müharibə veteranı, habelə şəhid ədliyyə işçisi R.Xəlilovun həyat yoldaşı hərtərəfli dövlət qayğısı ilə əhatə olunmalarına görə ölkə Prezidentinə minnətdarlıqlarını ifadə ediblər.

Tədbirdə Türk və İslam dünyasının mədəniyyət paytaxtı elan olunmuş Şuşa şəhərinin tarixi əhəmiyyətindən danışılıb, əslən Şuşadan olan ədliyyə işçisi çıxış edərək öz təəssüratlarını bölüşüb.

Zəfər Gününün ildönümü ilə bağlı ədliyyə orqanlarında çalışan Vətən müharibəsi veteranları mükafatlandırılıb, ailə üzvü şəhid olmuş işçilərin evlərinə baş çəkilərək qayğı göstərilib, Ədliyyə Akademiyasında gənc əməkdaşlar və könüllülərlə müharibə veteranlarının görüşü keçirilib, xalqımızın parlaq zəfərinin və ordumuzun qəhrəmanlığının təcəssümü olan Hərbi Qənimətlər Parkı ilə tanışlıq olub, nazirliyin Zəfər muzeyi yeni ekspozisiyalarla zənginləşdirilib, video-çarxlar, slaydlar nümayiş etdirilib, mediada çıxışlar edilir, nazirliyin internet və sosial media səhifələrində məlumatlar paylaşılır.