Banklarda stress-testlər aparılacaq

Banklarda stress-testlərin aparılması qaydası təsdiqlənib.

ANmedia.az Oxu.Az-a istinadən bildirirki, bununla bağlı müvafiq qərar imzalanıb.

Qərara əsasən, bank onun risk profilinə mənfi təsir edə biləcək hadisələrin müəyyən edilməsi və qiymətləndirilməsi üçün stress-testlər aparacaq və nəticələri əsasında tədbirlər planı hazırlayacaq.

Stress-testin nəticələri bankın strateji planının, habelə bankın risk iştahasının, siyasətinin, limitlərinin və daxili qaydalarının hazırlanmasında və təkmilləşdirilməsində nəzərə alınacaq.

Stress-testlərin tərtibi zamanı ekonometrik modellərdən istifadə ediləcək.

Qərara əsasən, bank portfel və bank səviyyəsində həssaslıq təhlilləri aparmalıdır. Həssaslıq təhlili bankın bir risk amilinə olan həssaslığını ölçmək məqsədilə həmin risk amilinin stressə məruz qoyulmasıdır. Məsələn, bank faiz dərəcələrindəki dəyişikliyin, likvid aktivlərin dəyərindəki azalmanın, müflis olma ehtimallarının artımının və iri tərəfdaşların iflasının banka təsirini ölçə bilər. Bu cür təhlillər risklərin və potensial konsentrasiyaların müəyyənləşdirilməsinə xidmət edir.

Həssaslıq təhlillərində bank tərəfindən müəyyən edilmiş risk amillərinə fərqli şiddət səviyyələrində şoklar verilməlidir. Şokların şiddətinin müəyyənləşdirilməsində uzunmüddətli tarixi dinamikadan istifadə olunmalıdır. Risk amillərinə olan həssaslığı effektiv ölçmək məqsədilə bank tarixi məlumatlar və təcrübəyə əsaslanan təhlilləri hipotetik hadisələrlə dəstəkləməlidir.

Qərarda "bottom-up" stres-testlərinə dair tələblər də yer alıb. Belə ki, AMB hər il dekabrın 30-dək illik, iyunun 30-dək isə yarımillik stres-testlər üçün makroiqtisadi proqnozları banklara təqdim edəcək.

Sistem əhəmiyyətli banklar "bottom-up" stres-testlərini yarımillik və illik əsasda, digər banklar isə illik əsasda həyata keçirməlidir. İllik stress-testlərin nəticələri və tədbirlər planı makroiqtisadi proqnozlar təqdim olunduqdan sonra 45 təqvim günü ərzində Mərkəzi Banka təqdim edilməlidir.