Qarabağ Dirçəliş Fondunun maliyyə hesabatları “PwC”nin auditindən uğurla keçdi

Qarabağ Dirçəliş Fondu 31 dekabr 2024-cü il tarixinə Maliyyə Hesabatlarının Beynəlxalq Standartlarına (MHBS) uyğun hazırlanmış maliyyə hesabatlarını və müstəqil auditor “PwC Azərbaycan” şirkətinin müvafiq dövr üzrə apardığı audit yoxlamalarına dair hesabatını (rəyini) dərc edib.

ANmedia.az Qafqazinfo-ya istinadən xəbər verir ki, Fondun maliyyə hesabatları 31 dekabr 2024-cü il tarixinə maliyyə vəziyyəti, həmin tarixdə başa çatmış il üzrə mənfəət və ya zərər və sair məcmu gəlir, kapitalda dəyişikliklər və pul vəsaitlərinin hərəkəti haqqında hesabatı əhatə edir.
Maliyyə hesabatına dair verilən rəydə qeyd olunub: “Bizim fikrimizcə, hazırkı maliyyə hesabatları bütün əhəmiyyətli aspektlər baxımından “Qarabağ Dirçəliş Fondu”nun (“Fond”) 31 dekabr 2024-cü il tarixinə maliyyə vəziyyətini və həmin tarixdə başa çatmış il üzrə maliyyə nəticələrini və pul vəsaitlərinin hərəkətini Maliyyə Hesabatlarının Beynəlxalq Standartlarına uyğun olaraq düzgün əks etdirir”.
Qeyd edilməlidir ki, Müşahidə Şurasının digər müvafiq qərarı ilə auditorun rəyi qəbul edilib.
Məlumat üçün bildirək ki, 2024-cü il ərzində Qarabağ Dirçəliş Fonduna ümumilikdə 80,286,899 manat ianə olunub.
Eyni zamanda qeyd olunmalıdır ki, Fond sərbəst vəsaitin bir qismini qiymətli kağızlara yerləşdirməklə 2024-cü il ərzində 74,579,021 manat maliyyə (investisiya) gəliri əldə edib.
Əldə edilən maliyyə gəlirləri keçən ilin göstəriciləri ilə müqayisədə 58% artıb. Nəticədə, maliyyə gəlirlərinin Fondun il üzrə ümumi gəlirlərində payı 18.60%-dən 48.16%-ə qədər yüksəlib.
Bununla da, 31 dekabr 2024-cü il tarixinə Fondun cəmi aktivlərinin həcmi 9.5% və ya 140,7 milyon manat artaraq 1,617,812,902 manata çatıb.
Eyni zamanda qeyd olunmalıdır ki, 2024-cü il üçün Fondun mənfəət vergisi 14,596,022 AZN təşkil edib ki, bu da 2023-cü illə müqayisədə 5,198,877 manat (55.32% ) çoxdur.
Fondun hesabatları və auditorun rəyi ilə Fondun rəsmi saytında Azərbaycan və ingilis dillərində tanış olmaq olar.
Azərbaycan dilində:  https://qdf.gov.az/media/files/article/255/MHBS-uygun-Maliyye-Hesabatlari-ve-Musteqil-Auditorun-Hesabati-2024.pdf
İngilis dilində:  https://qdf.gov.az/media/files/article/255/IFRS-Financial-Statements-and-Independent-Auditor-s-Report-2024.pdf
Xatırladaq ki, Azərbaycan Prezidenti İlham Əliyevin 4 yanvar 2021-ci il tarixli Fərmanı əsasında yaradılan Qarabağ Dirçəliş Fondunun Nizamnaməsinə əsasən, Fond öz fəaliyyətində və idarəetmədə mütərəqqi korporativ idarəetmə standartlarını tətbiq edir. Bu standartlara uyğun olaraq, Fondun kənar auditorunu təyin etmək və audit hesabatını qəbul etmək Müşahidə Şurasının əsas vəzifələrindən biridir.